“…dhe thuaj o Zot ma shto diturinë!”

Ruajtja e terminologjisë islame garanton ruajtjen e origjinalitetit dhe autoktonisë së përmbajtjes islame, kurse relativizimi i saj mund të na bëjë autorë, por jo kumtues. Ja, fjala bie, koncepti i kavamës (kujdestaria e burrit për bashkëshorten dhe familjen), është vlerë autoktone e Islamit dhe, pa dyshim, veç me origjinalitetin e saj jep frytshmërinë e pritshme. Mirëpo ç’ndodh?! Muslimanët e pushtuar nga kultura dominuese, nuk e dinë me çfarë monedhe duan të hyjnë në tregun e jetës dhe në fund dalin pa frytshmërinë e konceptit të kavamës. Kavama është barrë e burrit, kurse kultura dominuese i ngarkon të dytë. Kavama është syçelësi për përgjegjësitë e patjetërsueshme, kurse kultura dominuese të trishton që ta shtyesh pafund martesën. Kavama është ekuilibrim i privilegjeve me përgjegjësi, kurse kultura dominuese është mjegull që nuk garanton as familje në martesë, e as ndershmëri në beqari. Rrini autoktonë dhe gëzoni frytet në plotësi! - 17.04.2025

Je duke jetuar me shumë të mira, ndërkohë që po të lumturojnë gjurmët e lutjes: “O Zot, më jep të mira në këtë jetë!”, dhe do të vazhdosh t’i numërosh ato, derisa të vijë gjurma që do t’i gëlltit të gjitha: tevekuli i përnjëmendtë në Allahun. Me Njëshin për tek Njëshi. 13.03.2025

Në truallin e hajrit mund të lind edhe sherri, e këtë dijetarët kaherët e kishin vënë re. Dikush kishte thënë, se sëmundjet më të shpeshta që lindin duke jetësuar vepra a veti të mira, janë, fjala vjen, te ibadeti syfaqësia, te mençuria vetëpëlqimi, te mendjemprehtësia vulgariteti, te kursimi koprracia, te bujaria mburrja, e te dituria mendjemadhësia, e kështu me rradhë. E lum pra, për gjithsecilin që ka hyrë në truallin e davetit, pa rrënuar trashëgiminë shekullore të atyre që na e ruajtën fenë me sinqeritet e këmbëngulje, që ka hyrë në truallin e selefizmit, pa përfunduar në sektarizëm, dhe që ka hyrë në truallin e veprimtarisë reformuese, pa përfunduar në urrejtjen e tjetrit që mundohet e përpiqet tjetërkund. Djalli dhe uni yt, atëherë kur ngjyrosjen e ke me vlera, dredhinë ta luajnë pikërisht tek fusha e vlerës të cilës ti i takon. E po, më mirë zgurdulloi sytë nga habia qysh e mira ta thyeka qafën, sesa t’i hapësh sytë i trishtuar kur të shohësh regjistrin e zullumeve në Ditën e Gjykimit. - 24.03.2025

Llafet me urrejtje dhe thashethemet me llafazanëri, janë valle e ansamblit të kulturës së shkretë. Ajo josh shumëkënd, por jo atë që është ulur këmbëkryq për t’i vështruar ambiciet e veta dhe as atë që ka përveshur mëngët për të prashitur xhenetin e tij. Entuziazmi duke parë kallinjtë e kësaj dynjaje, mund të shuhet kur kallinjtë shkatërrohen nga stuhitë, kurse entuziazmi duke aspiruar të korrurat e ahiretit, veç çka shkon e shtohet. E pra, shokë, ecni duke injoruar fishkëllimat e idhnakëve, se kontrata me Allahun është më e madhe sesa të shpërqëndrohet nga vocërrimat. - 24.03.2025